ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠪᠤᠰᠤᠳ ᠤᠨ ᠭᠠᠷ ᠢᠶᠠᠷ ᠳᠠᠮᠵᠢᠭᠰᠠᠨ ᠰᠤᠶᠤᠯ ᠪᠣᠯ ᠬᠥᠷᠦᠭᠰᠡᠨ  ᠴᠠᠢ ᠲᠠᠢ ᠠᠳᠠᠯᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-01-15
     ᠠᠮᠧᠷᠢᠺᠠ ᠨᠢᠭᠡᠳᠦᠭᠰᠡᠨ ᠤᠯᠤᠰ ᠤᠨ ᠵᠣᠬᠢᠶᠠᠯᠴᠢ ᠡᠸ᠋ᠷᠨᠢᠰᠲ · ᠡᠾᠮᠢᠩᠸᠧᠢ ᠶᠢᠨ 1954 ᠣᠨ ᠳᠤ  ᠨᠣᠪᠧᠯ ᠤᠨ ᠤᠳᠬ᠎ᠠ ᠵᠣᠬᠢᠶᠠᠯ ᠤᠨ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ︵The Old  Man  and  the  Sea︶ ᠲᠤᠭᠤᠵᠢ  ᠳᠡᠯᠡᠬᠡᠢ ᠶᠢᠨ  ᠣᠯᠠᠨ  ᠬᠡᠯᠡᠨ ᠳᠤ  ᠣᠷᠴᠢᠭᠤᠯᠤᠭᠳᠠᠨ  ᠬᠡᠪᠯᠡᠭᠳᠡᠵᠦ᠂  ᠤᠩᠰᠢᠭᠴᠢ  ᠲᠦᠮᠡᠨ ᠤ  ᠲᠠᠭᠠᠰᠢᠶᠠᠯ ᠳᠤ ᠬᠦᠷᠦᠭᠰᠡᠭᠡᠷ ᠢᠷᠡᠯ᠎ᠡ᠃  ᠭᠡᠳᠡᠯ᠎ᠡ  ᠳᠤᠮᠳᠠᠳᠤ  ᠤᠯᠤᠰ ᠤᠨ  ᠮᠣᠩᠭᠤᠯ  ᠦᠨᠳᠦᠰᠦᠲᠡᠨ ᠤ  ᠤᠩᠰᠢᠭᠴᠢᠳ ᠤᠨ  ᠡᠮᠦᠨ᠎ᠡ ᠨᠢ ᠤᠩᠰᠢᠵᠤ  ᠪᠠᠶᠢᠭᠰᠠᠨ  ᠬᠤᠪᠢᠯᠪᠤᠷᠢ ᠨᠢ  ᠠᠩᠭ᠍ᠯᠢ  ᠬᠡᠯᠡᠨ ᠠᠴᠠ  ᠰᠢᠭᠤᠳ  ᠣᠷᠴᠢᠭᠤᠯᠤᠭᠰᠠᠨ  ᠪᠤᠰᠤ᠂  ᠬᠠᠷᠢᠨ  ᠪᠤᠰᠤᠳ ᠬᠡᠯᠡᠨ ᠠᠴᠠ ᠳᠠᠮ ᠣᠷᠴᠢᠭᠤᠯᠤᠭᠰᠠᠨ ᠣᠷᠴᠢᠭᠤᠯᠭ᠎ᠠ ᠨᠤᠭᠤᠳ ᠪᠠᠶᠢᠪᠠ᠃      ᠪᠡᠭᠡᠵᠢᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ  ᠫᠷᠣᠹᠧᠰᠰᠣᠷ  ᠳᠤᠯᠠᠭᠠᠨ  ︵ᠴᠧᠨ  ᠭᠠᠩ  ᠯᠦᠩ︶  2013  ᠣᠨ ᠳᠤ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠲᠤᠭᠤᠵᠢ ᠶᠢ ᠠᠩᠭ᠍ᠯᠢ  ᠬᠡᠯᠡᠨ ᠠᠴᠠ  ᠰᠢᠭᠤᠳ  ᠮᠣᠩᠭᠤᠯ  ᠬᠡᠯᠡᠨ ᠳᠤ  ᠣᠷᠴᠢᠭᠤᠯᠤᠭᠰᠠᠨ  ᠪᠥᠭᠡᠳ ᠲᠤᠬᠠᠢ ᠶᠢᠨ ᠵᠢᠯ ᠤᠨ ︽ᠦᠨᠳᠦᠰᠦᠲᠡᠨ ᠤ ᠤᠳᠬ᠎ᠠ ᠵᠣᠬᠢᠶᠠᠯ︾ ᠰᠡᠳᠬᠦᠯ ᠤᠨ ᠮᠣᠩᠭᠤᠯ ᠬᠡᠪᠯᠡᠯ ᠤᠨ 4᠂ 5 ᠳ᠋ᠤᠭᠠᠷ ᠤᠳ ᠲᠤ ᠦᠷᠭᠦᠯᠵᠢᠯᠡᠨ ᠨᠡᠶᠢᠲᠡᠯᠡᠭᠰᠡᠨ ᠪᠠᠶᠢᠳᠠᠭ᠃  ᠲᠤᠩ  ᠤᠳᠠᠯ  ᠦᠭᠡᠢ  ︽ᠳᠡᠯᠡᠬᠡᠢ ᠶᠢᠨ  ᠤᠳᠬ᠎ᠠ  ᠵᠣᠬᠢᠶᠠᠯ︾  ᠴᠤ  ᠡᠭᠦᠨ ᠢ ᠰᠢᠯᠵᠢᠭᠦᠯᠦᠨ ᠨᠡᠶᠢᠲᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠮᠣᠩᠭᠤᠯ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠨᠢ ᠳᠡᠯᠡᠬᠡᠢ ᠶᠢᠨ ᠰᠣᠩᠭᠤᠳᠠᠭ ᠵᠣᠬᠢᠶᠠᠯ ᠢ ᠰᠢᠭᠤᠳ ᠡᠬᠡ ᠬᠡᠯᠡᠨ ᠠᠴᠠ ᠨᠢ ᠡᠬᠡ ᠬᠡᠯᠡ ᠤᠷᠤᠭᠤ ᠤᠷᠴᠢᠭᠤᠯᠬᠤ ᠵᠢᠱᠢᠶ᠎ᠡ ᠪᠣᠯᠵᠤ᠂ ︽ᠦᠨᠳᠦᠰᠦᠲᠡᠨ ᠤ  ᠤᠳᠬ᠎ᠠ  ᠵᠣᠬᠢᠶᠠᠯ︾ ᠶᠢᠨ ᠣᠨ ᠤ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠪᠠᠶᠢᠳᠠᠭ᠃      ᠡᠨᠡ ᠵᠢᠯ ᠤᠨ 5 ᠰᠠᠷ᠎ᠠ ᠳᠤ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠵᠣᠬᠢᠶᠠᠯ ᠢ ᠥᠪᠥᠷ ᠮᠣᠩᠭᠤᠯ ᠤᠨ ᠪᠠᠭᠠᠴᠤᠳ  ᠬᠡᠦᠬᠡᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠠᠴᠠ ᠬᠡᠪᠯᠡᠵᠦ ᠮᠣᠩᠭᠤᠯ ᠤᠩᠰᠢᠭᠴᠢᠳ ᠤᠨ ᠢᠶᠠᠨ ᠭᠡᠭᠡᠨ ᠮᠡᠯᠮᠡᠢ ᠳᠤ  ᠬᠦᠷᠭᠡᠭᠰᠡᠨ  ᠪᠠᠶᠢᠨ᠎ᠠ᠃  ᠡᠨᠡᠬᠦ ᠲᠤᠭᠤᠵᠢ ᠨᠢᠭᠡ ᠰᠠᠷ᠎ᠠ ᠬᠦᠷᠬᠦ ᠦᠭᠡᠢ ᠬᠤᠭᠤᠴᠠᠭᠠᠨ ᠳᠤ ᠲᠦᠮᠡ ᠭᠠᠷᠤᠢ ᠰᠢᠷᠬᠡᠭ ᠪᠣᠷᠣᠯᠠᠭᠤᠯᠤᠭᠳᠠᠭᠰᠠᠨ ᠪᠥᠭᠡᠳ ᠬᠡᠳᠦ ᠬᠡᠳᠦ ᠤᠳᠠᠭ᠎ᠠ ᠳᠠᠬᠢᠨ ᠬᠡᠪᠯᠡᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃      ᠮᠣᠩᠭᠤᠯ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠤᠨ ᠲᠤᠬᠠᠢ ᠨᠡᠩ  ᠰᠠᠶᠢᠨ  ᠣᠶᠢᠯᠠᠭᠠᠯᠲᠠ  ᠠᠪᠬᠤ ᠶᠢᠨ  ᠲᠤᠯᠠᠳᠠ  ᠰᠣᠯᠣᠩᠭ᠎ᠠ ᠮᠡᠳᠡᠭᠡᠯᠡᠯ ᠤᠨ ᠲᠥᠪ ᠡᠨᠡᠬᠦ ᠲᠤᠭᠤᠵᠢ ᠶᠢ ᠠᠩᠭ᠍ᠯᠢ ᠬᠡᠯᠡᠨ ᠠᠴᠠ ᠰᠢᠭᠤᠳ ᠮᠣᠩᠭᠤᠯ ᠬᠡᠯᠡᠨ ᠳᠤ  ᠣᠷᠴᠢᠭᠤᠯᠤᠭᠰᠠᠨ  ᠳᠤᠯᠠᠭᠠᠨ ᠪᠠᠭᠰᠢ ᠲᠠᠢ ᠶᠠᠷᠢᠯᠴᠠᠯᠭ᠎ᠠ ᠥᠷᠨᠢᠭᠦᠯᠦᠭᠰᠡᠨ ᠢ ᠰᠣᠨᠢᠷᠬᠠᠭᠤᠯᠤᠶ᠎ᠠ᠃      —ᠲᠠ ᠰᠠᠶᠢᠨ ᠪᠠᠶᠢᠨ᠎ᠠ ᠤᠤ︖      —ᠰᠠᠶᠢᠨ ᠪᠠᠶᠢᠨ᠎ᠠ᠃ ᠰᠣᠯᠣᠩᠭ᠎ᠠ ᠰᠡᠳᠬᠦᠯ ᠤᠨ ᠥᠷᠭᠡᠨ ᠣᠯᠠᠨ ᠤᠩᠰᠢᠭᠴᠢᠳ ᠲᠤ ᠪᠠᠨ ᠥᠨᠥᠳᠥᠷ ᠤᠨ  ᠠᠮᠤᠷ ᠠᠮᠤᠭᠤᠯᠠᠩ ᠢ ᠠᠶᠢᠯᠠᠳᠬᠠᠵᠤ ᠪᠠᠶᠢᠨ᠎ᠠ᠃          —ᠴᠤᠬᠤᠮ ᠶᠠᠭᠠᠬᠢᠭᠠᠳ ᠡᠸ᠋ᠷᠨᠢᠰᠲ ·  ᠡᠾᠮᠢᠩᠸᠧᠢ ᠶᠢᠨ  ︽ᠡᠪᠦᠭᠡᠨ  ᠪᠠ  ᠳᠠᠯᠠᠢ︾  ᠲᠤᠭᠤᠵᠢ ᠶᠢ  ᠰᠣᠩᠭᠤᠨ ᠣᠷᠴᠢᠭᠤᠯᠤᠭᠰᠠᠨ ᠲᠤᠬᠠᠢ ᠳᠤ ᠶᠠᠷᠢᠶ᠎ᠠ ᠪᠠᠨ ᠡᠬᠢᠯᠡᠭᠦᠯᠦᠶ᠎ᠡ      —︽ᠡᠪᠦᠭᠡᠨ  ᠪᠠ  ᠳᠠᠯᠠᠢ︾ ᠤᠨ  ᠮᠣᠩᠭᠤᠯ  ᠣᠷᠴᠢᠭᠤᠯᠭ᠎ᠠ  ᠪᠣᠭᠤᠨᠢ  ᠬᠤᠭᠤᠴᠠᠭᠠᠨ ᠳᠤ  6000  ᠰᠢᠷᠬᠡᠭ ᠪᠣᠷᠣᠯᠠᠭᠤᠯᠤᠭᠳᠠᠭᠰᠠᠨ᠃ ᠥᠨᠥᠳᠥᠷ ᠢ ᠬᠦᠷᠲᠡᠯ᠎ᠡ ᠲᠦᠮᠡᠡ ᠰᠢᠷᠬᠡᠭ ᠤᠨ ᠵᠠᠬᠢᠶᠠᠯᠠᠭ᠎ᠠ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠪᠠᠶᠢᠭ᠎ᠠ  ᠪᠥᠭᠡᠳ ᠦᠷᠭᠦᠯᠵᠢᠯᠡᠨ  ᠨᠡᠮᠡᠭᠳᠡᠭᠰᠡᠭᠡᠷ  ᠪᠠᠶᠢᠨ᠎ᠠ᠃  ᠡᠨᠡ ᠨᠢ  ᠪᠢᠳᠡᠨ ᠤ  ᠬᠡᠦᠬᠡᠳ  ᠵᠠᠯᠠᠭᠤᠴᠤᠳ  ᠮᠣᠩᠭᠤᠯ  ᠨᠣᠮ   ᠪᠢᠴᠢᠭ ᠲᠤ ᠬᠤᠷᠣᠬᠠᠢ ᠲᠠᠢ ᠪᠠᠶᠢᠭ᠎ᠠ ᠶᠢ ᠬᠠᠷᠠᠭᠤᠯᠵᠤ ᠴᠢᠳᠠᠭᠰᠠᠨ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠶᠢᠨ᠎ᠠ᠃  ᠬᠠᠷᠢᠨ  ᠲᠣᠮᠣᠴᠤᠳ ᠠᠴᠠ  ᠬᠡᠦᠬᠡᠳ ᠪᠠᠭᠠᠴᠤᠳ ᠲᠤ ᠪᠠᠨ ᠪᠡᠯᠡᠳᠦᠭᠰᠡᠨ ᠲᠤᠰᠬᠠᠢ ᠵᠣᠷᠢᠭᠤᠯᠤᠯᠳᠠᠢ ᠨᠣᠮ ᠲᠤᠩ ᠳᠤᠲᠠᠮᠠᠭ ᠪᠠᠶᠢᠨ᠎ᠠ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠤ ᠪᠠᠨ ᠵᠣᠷᠢᠭᠤᠯᠤᠭᠰᠠᠨ ᠨᠣᠮ᠂ ᠪᠦᠲᠦᠭᠡᠯ ᠤᠳ ᠪᠠᠭ᠎ᠠ ᠬᠡᠪᠯᠡᠭᠳᠡᠵᠦ ᠪᠠᠶᠢᠨ᠎ᠠ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨ᠎ᠠ᠃      ᠢᠯᠠᠩᠭᠤᠶ᠎ᠠ᠂ ᠮᠣᠩᠭᠤᠯᠴᠤᠳ ᠤᠨ ᠤᠩᠰᠢᠵᠤ ᠪᠤᠢ ᠭᠠᠳᠠᠭᠠᠳᠤ ᠤᠷᠠᠨ ᠵᠣᠬᠢᠶᠠᠯ ᠤᠳ ᠤᠨ ᠶᠡᠬᠡᠩᠬᠢ ᠬᠡᠰᠡᠭ ᠨᠢ ᠬᠡᠯᠡ ᠳᠠᠮᠵᠢᠨ ᠣᠷᠴᠢᠭᠤᠯᠤᠭᠳᠠᠭᠰᠠᠨ ᠣᠷᠴᠢᠭᠤᠯᠭ᠎ᠠ ᠨᠤᠭᠤᠳ᠃ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠪᠠᠷ ᠵᠢᠱᠢᠶᠡᠯᠡᠬᠦ ᠳᠤ  ᠮᠣᠩᠭᠤᠯᠴᠤᠳ ᠤᠨ ᠤᠩᠰᠢᠵᠤ ᠪᠠᠶᠢᠭᠰᠠᠨ ᠨᠢ  ᠬᠢᠲᠠᠳ᠂  ᠣᠷᠣᠰ  ᠬᠡᠯᠡᠨ ᠠᠴᠠ  ᠳᠠᠮ  ᠣᠷᠴᠢᠭᠤᠯᠤᠭᠰᠠᠨ  ᠣᠷᠴᠢᠭᠤᠯᠭ᠎ᠠ ᠨᠤᠭᠤᠳ᠃  ᠡᠨᠡᠬᠦ ᠶᠠᠪᠤᠴᠠ ᠳᠤ ᠦᠵᠡᠯ ᠤᠬᠠᠮᠰᠠᠷ ᠪᠣᠯᠤᠨ ᠰᠤᠶᠤᠯ ᠤᠨ ᠤᠯᠠᠮᠵᠢᠯᠠᠯ ᠤᠨ ᠰᠢᠭᠰᠢᠭᠳᠡᠬᠦ ᠦᠵᠡᠭᠳᠡᠯ ᠡᠭᠦᠰᠦᠭᠰᠡᠨ ᠢ ᠪᠢᠳᠡ  ᠪᠦᠬᠦᠨ ᠤᠶᠢᠯᠠᠭᠠᠬᠤ ᠶᠣᠰᠣᠲᠠᠢ᠃ ᠪᠢᠳᠡ ᠡᠶᠢᠮᠦᠷᠬᠡᠦ ᠪᠦᠲᠦᠭᠡᠯ ᠢ ᠬᠦᠯᠢᠶᠡᠨ ᠠᠪᠤᠭᠠᠳ ᠪᠠᠶᠢᠪᠠᠯ ︽ᠬᠥᠷᠦᠭᠰᠡᠨ  ᠴᠠᠢ︾ ᠢ  ᠤᠤᠭᠤᠵᠤ ᠪᠤᠢ ᠲᠠᠢ ᠠᠳᠠᠯᠢ ᠪᠠ ᠪᠤᠰᠤᠳ ᠤᠨ ᠭᠠᠷ ᠢᠶᠠᠷ ᠳᠠᠮᠵᠢᠭᠰᠠᠨ ᠰᠤᠶᠤᠯ ᠢ ᠬᠦᠯᠢᠶᠡᠵᠦ ᠠᠪᠴᠤ ᠪᠠᠶᠢᠭ᠎ᠠ ᠲᠠᠢ ᠠᠳᠠᠯᠢ ᠰᠢᠦ ᠳ᠋ᠡ᠃      ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂ ᠪᠢ  ᠥᠪᠡᠷ ᠢᠶᠠᠨ  ᠡᠸ᠋ᠷᠨᠢᠰᠲ  ·  ᠡᠾᠮᠢᠩᠸᠧᠢ ᠶᠢᠨ  ᠪᠦᠲᠦᠭᠡᠯ ᠤᠳ ᠢ  ᠲᠤᠩ  ᠶᠡᠭᠡ ᠰᠣᠨᠢᠷᠬᠠᠳᠠᠭ᠃ ᠡᠨᠡᠬᠦ ᠲᠤᠭᠤᠵᠢ ᠶᠢᠨ ᠭᠤᠣᠯ ᠳᠦᠷᠢ ᠪᠣᠯᠬᠤ ᠰᠠᠨᠲ᠋ᠢᠶᠠᠭᠤ᠋ ᠡᠪᠦᠭᠡᠨ ᠤ ᠨᠤᠭᠤᠷᠠᠬᠤ ᠠᠴᠠ  ᠪᠢᠰᠢ᠂  ᠬᠤᠭᠤᠷᠠᠬᠤ ᠦᠭᠡᠢ ᠡᠷ᠎ᠡ ᠵᠣᠷᠢᠭ ᠢ ᠲᠤᠩ ᠪᠢᠰᠢᠷᠡᠳᠡᠭ᠃       —ᠡᠨᠡᠬᠦ ᠲᠤᠭᠤᠵᠢ ᠳᠡᠯᠡᠬᠡᠢ ᠳᠤ ᠠᠯᠳᠠᠷᠰᠢᠭᠰᠠᠨ  ᠤᠴᠢᠷ  ᠣᠯᠠᠨ  ᠬᠡᠯᠡᠨ ᠢᠶᠠᠨ  ᠣᠷᠴᠢᠭᠤᠯᠤᠭᠳᠠᠭᠰᠠᠨ᠃  ᠲᠠ ᠪᠤᠰᠤᠳ ᠬᠡᠪᠯᠡᠯ ᠤᠨ ᠲᠤᠬᠠᠢ ᠲᠠᠨᠢᠯᠴᠠᠭᠤᠯᠤᠨ᠎ᠠ ᠤᠤ︖      —ᠪᠢ ᠥᠪᠡᠷ ᠢᠶᠠᠨ  ᠮᠣᠩᠭᠤᠯ᠂  ᠬᠢᠲᠠᠳ᠂  ᠶᠠᠫᠣᠨ᠂  ᠠᠩᠭ᠍ᠯᠢ  ᠬᠡᠯᠡ ᠲᠠᠢ  ᠬᠦᠮᠦᠨ᠃  ᠲᠡᠶᠢᠮᠦ ᠠᠴᠠ  ᠡᠨᠡᠬᠦ ᠲᠤᠭᠤᠵᠢ ᠶᠢ  ᠣᠷᠴᠢᠭᠤᠯᠬᠤ ᠠᠴᠠ  ᠡᠮᠦᠨ᠎ᠡ  ᠥᠪᠡᠷ ᠤᠨ  ᠣᠶᠢᠯᠠᠭᠠᠳᠠᠭ  ᠬᠡᠯᠡᠨ ᠳᠤ  ᠣᠷᠴᠢᠭᠤᠯᠤᠭᠳᠠᠭᠰᠠᠨ   ᠬᠡᠪᠯᠡᠯ ᠤᠨ ᠣᠷᠴᠢᠭᠤᠯᠭ᠎ᠠ ᠶᠢᠨ ᠪᠦᠲᠦᠭᠡᠯ ᠤᠳ ᠢ ᠣᠯᠳᠠᠬᠤ ᠶᠢᠨ ᠬᠢᠷᠢ ᠪᠠᠷ ᠨᠢ ᠤᠩᠰᠢᠭᠰᠠᠨ  ᠶᠤᠮ᠃  ᠢᠩᠭᠢᠵᠦ  ᠬᠠᠷᠢᠴᠠᠭᠤᠯᠤᠭᠰᠠᠨ ᠤ ᠳ᠋ᠦᠩ ᠳᠤ ᠬᠢᠲᠠᠳ ᠬᠡᠯᠡ ᠳᠡᠭᠡᠷ᠎ᠡ ᠪᠠᠷᠤᠭ 100 ᠭᠠᠷᠤᠢ ᠣᠷᠴᠢᠭᠤᠯᠭ᠎ᠠ ᠪᠤᠢ ᠪᠥᠭᠡᠳ ᠣᠯᠠᠩᠬᠢ ᠨᠢ ᠠᠯᠳᠠᠷᠲᠠᠢ ᠬᠦᠮᠦᠰ ᠤᠨ ᠣᠷᠴᠢᠭᠤᠯᠭ᠎ᠠ ᠪᠣᠯᠤᠨ᠎ᠠ᠃ ᠡᠭᠦᠨ ᠳᠤ᠂ ᠨᠡᠷᠡᠲᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠢᠦᠢ ᠭᠤᠸᠠᠩ ᠵᠦᠩ᠂ ᠨᠡᠷᠡᠲᠦ ᠵᠣᠬᠢᠶᠠᠯᠴᠢ  ᠵᠠᠩ  ᠠᠢ ᠯᠢᠩ ᠪᠣᠯᠤᠨ ᠠᠯᠳᠠᠷᠲᠤ ᠣᠷᠴᠢᠭᠤᠯᠤᠭᠴᠢ  ᠯᠢ  ᠸᠧᠨ  ᠵᠢᠶᠦ᠋ᠨ  ᠨᠠᠷ ᠤᠨ  ᠣᠷᠴᠢᠭᠤᠯᠭ᠎ᠠ  ᠪᠦᠭᠦᠳᠡ  ᠥᠪᠡᠷ ᠤᠨ  ᠭᠡᠰᠡᠨ ᠣᠨᠴᠠᠯᠢᠭ ᠲᠠᠢ᠃      ᠲᠠᠶᠢᠸᠠᠨ ᠤ  ᠠᠯᠳᠠᠷᠲᠤ  ᠣᠷᠴᠢᠭᠤᠯᠤᠭᠴᠢ  ᠴᠢᠨ  ᠵᠢᠶᠦ᠋ᠨ  ᠢ  ᠪᠣᠯ  ᠳᠠᠯᠠᠢ  ᠲᠡᠩᠭᠢᠰ ᠤᠨ  ᠲᠤᠬᠠᠢ  ᠲᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠮᠡᠳᠡᠯᠭᠡ ᠲᠠᠢ ᠤᠴᠢᠷ ᠣᠷᠴᠢᠭᠤᠯᠭ᠎ᠠ ᠨᠢ ᠲᠤᠩ ᠣᠨᠣᠪᠴᠢᠲᠠᠢ ᠪᠥᠭᠡᠳ ᠤᠷᠤᠰᠤᠮ᠎ᠠ ᠰᠠᠶᠢᠬᠠᠨ ᠪᠠᠶᠢᠳᠠᠭ᠃  ᠯᠢ ᠸᠧᠨ  ᠵᠢᠶᠦ᠋ᠨ ᠤ  80  ᠨᠠᠰᠤᠲᠠᠢ  ᠦᠶ᠎ᠠ ᠳᠡᠭᠡᠨ  ᠣᠷᠴᠢᠭᠤᠯᠤᠭᠰᠠᠨ  ᠣᠷᠴᠢᠭᠤᠯᠭ᠎ᠠ ᠨᠢ   ᠪᠣᠭᠤᠨᠢ   ᠣᠶᠢᠯᠠᠭᠠᠮᠵᠢᠲᠠᠢ᠂ ᠡᠾᠮᠢᠩᠸᠧᠢ ᠶᠢᠨ ᠬᠡᠯᠡᠨ ᠤ  ᠬᠡᠪ  ᠨᠠᠮᠪᠠ ᠶᠢ  ᠬᠠᠳᠠᠭᠠᠯᠠᠬᠤ  ᠭᠡᠵᠦ  ᠬᠢᠴᠢᠶᠡᠨ  ᠠᠵᠢᠯᠯᠠᠭᠰᠠᠨ ᠨᠢ  ᠲᠣᠳᠣᠷᠬᠠᠢ᠃  ᠳᠤᠮᠳᠠᠳᠤ ᠤᠯᠤᠰ ᠤᠨ ᠰᠡᠭᠦᠯ ᠤᠨ ᠦᠶ᠎ᠡ ᠶᠢᠨ ᠵᠠᠯᠠᠭᠤ ᠣᠷᠴᠢᠭᠤᠯᠤᠭᠴᠢ ᠯᠢ ᠵᠢᠢ ᠡᠾᠦ᠋ᠩ ᠡᠮᠦᠨᠡᠬᠢ  ᠬᠦᠮᠦᠰ ᠤᠨ  ᠣᠷᠴᠢᠭᠤᠯᠭ᠎ᠠ ᠶᠢᠨ 1000 ᠭᠠᠷᠤᠢ ᠠᠯᠳᠠᠭ᠎ᠠ ᠶᠢ ᠵᠢᠭᠠᠵᠤ ᠭᠠᠷᠭᠠᠨ ᠵᠠᠯᠠᠷᠠᠭᠤᠯᠤᠭᠰᠠᠨ ᠪᠢᠯᠡ᠃ ᠯᠢ ᠵᠢᠢ ᠡᠾᠦ᠋ᠩ ᠤᠨ ᠣᠷᠴᠢᠭᠤᠯᠭ᠎ᠠ  ᠨᠠᠳᠠ ᠳᠤ ᠴᠤ ᠭᠡᠰᠡᠨ ᠲᠤᠩ ᠲᠠᠭᠠᠰᠢᠶᠠᠭᠳᠠᠭᠰᠠᠨ᠃ ᠥᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ᠂ ᠡᠸ᠋ᠷᠨᠢᠰᠲ · ᠡᠾᠮᠢᠩᠸᠧᠢ ᠤᠨ  ︽ᠡᠪᠦᠭᠡᠨ  ᠪᠠ  ᠳᠠᠯᠠᠢ︾ ᠬᠡᠪᠯᠡᠭᠳᠡᠭᠰᠡᠨ ᠲᠠᠪᠢᠭᠠᠳ ᠵᠢᠯ ᠤᠨ ᠬᠤᠭᠤᠴᠠᠭᠠᠨ ᠳᠤ ᠬᠢᠲᠠᠳ ᠣᠷᠴᠢᠭᠤᠯᠭ᠎ᠠ  ᠦᠷᠭᠦᠯᠵᠢᠯᠡᠭᠰᠡᠭᠡᠷ  ᠪᠦᠭᠡᠳ  ᠪᠠᠰᠠ  ᠰᠢᠨ᠎ᠡ ᠣᠷᠴᠢᠭᠤᠯᠭ᠎ᠠ ᠬᠡᠪᠯᠡᠭᠳᠡᠭᠰᠡᠭᠡᠷ ᠪᠠᠶᠢᠨ᠎ᠠ᠃      ᠶᠠᠫᠣᠨ ᠬᠡᠯᠡ ᠳᠡᠭᠡᠷ᠎ᠡ ᠴᠤ ᠭᠡᠰᠡᠨ ᠡᠨᠡᠬᠦ ᠲᠤᠭᠤᠵᠢ ᠶᠢ ᠣᠯᠠᠨᠲᠠ ᠣᠷᠴᠢᠭᠤᠯᠤᠭᠰᠠᠨ ᠶᠤᠮ᠃ ᠶᠠᠫᠤᠨᠴᠤᠳ ︽ᠡᠪᠦᠭᠡᠨ ᠪᠠ  ᠳᠠᠯᠠᠢ︾  ᠲᠤᠭᠤᠵᠢ ᠶᠢᠨ  ᠠᠭᠤᠯᠭ᠎ᠠ ᠶᠢ  ᠲᠣᠳᠣ  ᠲᠣᠮᠣᠷᠠᠭᠤᠨ  ᠢᠯᠡᠷᠡᠭᠦᠯᠵᠦ   ᠴᠢᠳᠠᠭᠰᠠᠨ   ᠪᠠᠶᠢᠨ᠎ᠠ᠃   ᠡᠨᠡ ᠨᠢ ᠶᠠᠫᠤᠨᠴᠤᠳ ᠤᠨ ᠳᠠᠯᠠᠢ ᠲᠡᠩᠭᠢᠰ ᠪᠣᠯᠤᠨ ᠵᠢᠭᠠᠰᠤ ᠠᠩᠨᠠᠬᠤ ᠠᠮᠢᠳᠤᠷᠠᠯ ᠤᠨ ᠲᠤᠬᠠᠢ ᠰᠠᠶᠢᠨ ᠣᠶᠢᠯᠠᠭᠠᠯᠲᠠ ᠲᠠᠢ  ᠪᠠᠶᠢᠳᠠᠭ ᠲᠠᠢ ᠰᠢᠭᠤᠳ ᠬᠤᠯᠪᠣᠭ᠎ᠠ ᠲᠠᠢ᠃ ᠭᠡᠰᠡᠨ ᠬᠡᠳᠦᠢ ᠴᠤ ᠶᠠᠫᠣᠨ ᠣᠷᠴᠢᠭᠤᠯᠭ᠎ᠠ ᠶᠢᠨ ᠦᠭᠡ ᠥᠭᠦᠯᠡᠪᠦᠷᠢ ᠪᠠᠭ᠎ᠠ  ᠵᠡᠷᠭᠡ  ᠰᠤᠨᠵᠢᠷᠠᠭᠤ ᠰᠠᠨᠠᠭᠳᠠᠳᠠᠭ᠃      2010 ᠣᠨ ᠳᠤ  ᠮᠣᠩᠭᠤᠯ  ᠤᠯᠤᠰ ᠲᠤ  ᠠᠯᠳᠠᠷᠲᠤ  ᠣᠷᠴᠢᠭᠤᠯᠤᠭᠴᠢ  ᠭᠤᠳᠤᠪ ᠤᠨ  ᠠᠺᠢᠮ  ︽ᠡᠪᠦᠭᠡᠨ᠂ ᠲᠠᠩᠭᠢᠰ︾ ᠭᠡᠵᠦ ᠮᠣᠩᠭᠤᠯ ᠬᠡᠯᠡᠨ ᠳᠤ ᠣᠷᠴᠢᠭᠤᠯᠤᠭᠳᠠᠭᠰᠠᠨ ᠺᠢᠷᠢᠯ ᠦᠰᠦᠭ ᠤᠨ ᠬᠡᠪᠯᠡᠯ  ᠪᠤᠢ  ᠶᠤᠮ᠃  ᠬᠠᠷᠢᠨ  ᠥᠪᠥᠷ ᠮᠣᠩᠭᠤᠯ ᠳᠤ ᠡᠬᠡ ᠬᠡᠯᠡᠨ ᠠᠴᠠ ᠨᠢ ᠰᠢᠭᠤᠳ ᠣᠷᠴᠢᠭᠤᠯᠤᠭᠰᠠᠨ ᠣᠷᠴᠢᠭᠤᠯᠭ᠎ᠠ  ᠪᠠᠶᠢᠬᠤ  ᠦᠭᠡᠢ᠃  ᠡᠭᠦᠨ ᠠᠴᠠ  ᠡᠮᠦᠨ᠎ᠡ ᠣᠷᠴᠢᠭᠤᠯᠤᠭᠴᠢ ᠡᠦ ᠯᠤᠤ ᠶᠢᠨ ᠬᠢᠲᠠᠳ ᠬᠡᠪᠯᠡᠯ ᠢ ᠮᠣᠩᠭᠤᠯ ᠬᠡᠯᠡ ᠳᠡᠭᠡᠷ᠎ᠡ ᠣᠷᠴᠢᠭᠤᠯᠤᠭᠰᠠᠨ ᠬᠡᠪᠯᠡᠯ᠂ ᠮᠣᠩᠭᠤᠯ ᠤᠯᠤᠰ ᠤᠨ ᠰ᠊ ∙ ᠰᠠᠨᠳᠤᠭᠳᠣᠷᠵᠢ ᠶᠢᠨ ᠣᠷᠣᠰ ᠬᠡᠯᠡᠨ ᠠᠴᠠ ᠳᠠᠮ ᠣᠷᠴᠢᠭᠤᠯᠤᠭᠰᠠᠨ ᠺᠢᠷᠢᠯ  ᠪᠢᠴᠢᠭ ᠤᠨ  ᠬᠡᠪᠯᠡᠯ ᠢ  ᠳᠠᠬᠢᠨ  ᠪᠣᠰᠤᠭ᠎ᠠ ᠮᠣᠩᠭᠤᠯ ᠪᠢᠴᠢᠭ ᠲᠤ ᠬᠥᠷᠪᠡᠭᠦᠯᠦᠭᠰᠡᠨ ᠬᠡᠪᠯᠡᠯ ᠤᠳ ᠯᠠ ᠪᠠᠶᠢᠳᠠᠭ᠃      —︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠲᠤᠭᠤᠵᠢ ᠶᠢ ᠤᠷᠴᠢᠭᠤᠯᠬᠤ ᠶᠠᠪᠤᠴᠠ ᠳᠤ ᠲᠣᠬᠢᠶᠠᠯᠳᠤᠭᠰᠠᠨ ᠪᠡᠷᠬᠡᠰᠢᠶᠡᠯ ᠤᠳ  ᠶᠠᠭᠤ ᠪᠠᠶᠢᠨ᠎ᠠ︖      —ᠡᠭᠦᠨ ᠢ ᠬᠡᠯᠡᠬᠦ ᠠᠴᠠ ᠡᠮᠦᠨ᠎ᠡ ᠡᠸ᠋ᠷᠨᠢᠰᠲ · ᠡᠾᠮᠢᠩᠸᠧᠢ ᠶᠢᠨ ᠵᠣᠬᠢᠶᠠᠯ  ᠪᠦᠲᠦᠭᠡᠯ ᠤᠳ ᠤᠨ  ᠬᠡᠯᠡᠨ ᠤ  ᠬᠡᠪ ᠮᠠᠶ᠋ᠢᠭ ᠤᠨ ᠲᠤᠬᠠᠢ ᠲᠣᠪᠴᠢᠬᠠᠨ ᠬᠡᠯᠡᠶ᠎ᠡ᠃ ᠡᠸ᠋ᠷᠨᠢᠰᠲ · ᠡᠾᠮᠢᠩᠸᠧᠢ ᠶᠢᠨ  ᠬᠡᠯᠡᠨ ᠤ  ᠬᠡᠪ  ᠮᠠᠶ᠋ᠢᠭ  ᠪᠣᠯ  ᠲᠤᠩ  ᠲᠣᠪᠴᠢ ᠠᠪᠰᠠᠷᠬᠠᠨ᠂  ᠴᠥᠭᠡᠨ  ᠦᠭᠡ ᠪᠠᠷ  ᠭᠦᠨ  ᠰᠠᠨᠠᠭ᠎ᠠ ᠶᠢ  ᠢᠯᠡᠳᠬᠡᠳᠡᠭ ᠢᠶᠠᠷ ᠢᠶᠠᠨ  ᠣᠨᠴᠠᠯᠢᠭ  ᠶᠤᠮ᠃  ᠲᠡᠭᠦᠨ ᠤ  ᠡᠨᠡᠬᠦ ᠲᠤᠭᠤᠵᠢ ᠶᠢᠨ ᠠᠩᠭ᠍ᠯᠢ ᠬᠡᠯᠡᠨ ᠤ  ᠬᠡᠪᠯᠡᠯ ᠨᠢ  100  ᠣᠷᠴᠢᠮ  ᠬᠠᠭᠤᠳᠠᠰᠤ ᠲᠠᠢ᠃  ᠡᠭᠦᠨ ᠢ  ᠮᠣᠩᠭᠤᠯ  ᠬᠡᠯᠡ  ᠳᠡᠭᠡᠷ᠎ᠡ ᠣᠷᠴᠢᠭᠤᠯᠪᠠᠯ ᠶᠠᠭᠠᠬᠢᠵᠦ ᠡᠨᠡ ᠬᠠᠭᠤᠳᠠᠰᠤᠨ ᠤ  ᠬᠡᠮᠵᠢᠶᠡᠨ ᠠᠴᠠ  ᠬᠡᠲᠦᠷᠡᠭᠦᠯᠬᠦ  ᠦᠭᠡᠢ  ᠪᠥᠭᠡᠳ  ᠵᠣᠬᠢᠶᠠᠭᠴᠢ ᠶᠢᠨ  ᠤᠭ ᠰᠠᠨᠠᠭ᠎ᠠ᠂ ᠬᠡᠪ ᠪᠠᠶᠢᠳᠠᠯ ᠢ ᠨᠢ ᠠᠯᠳᠠᠭᠳᠠᠬᠤ ᠦᠭᠡᠢ ᠪᠠᠶᠢᠬᠤ ᠳᠤ ᠲᠤᠩ ᠬᠢᠴᠢᠶᠡᠭᠰᠡᠨ᠃ ᠬᠠᠮᠤᠭ ᠤᠨ ᠡᠴᠦᠰ ᠲᠤ ᠨᠢ ᠮᠣᠩᠭᠤᠯ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾ ᠨᠢ ᠵᠢᠭᠠᠰᠤᠨ ᠤ ᠲᠠᠶᠢᠯᠪᠤᠷᠢ ᠵᠢᠷᠤᠭ ᠤᠳ ᠢᠶᠠᠨ ᠬᠠᠮᠤᠷᠤᠭᠤᠯᠤᠭᠠᠳ ᠨᠡᠶᠢᠲᠡ 186 ᠬᠠᠭᠤᠳᠠᠰᠤ ᠲᠠᠢ ᠪᠣᠯᠭᠠᠭᠰᠠᠨ  ᠪᠠᠶᠢᠨ᠎ᠠ᠃  ᠡᠨᠡ ᠨᠢ  ᠬᠡᠦᠬᠡᠳ ᠤᠳ  ᠤᠩᠰᠢᠬᠤ ᠳᠤ  ᠰᠣᠨᠢᠷᠬᠠᠯᠲᠠᠢ  ᠪᠣᠯᠭᠠᠬᠤ ᠶᠢᠨ   ᠲᠤᠯᠠᠳᠠ   ᠲᠡᠳᠡᠨ ᠤ ᠬᠠᠷᠠᠭ᠎ᠠ ᠶᠢ ᠨᠢ ᠬᠠᠮᠠᠭᠠᠯᠠᠬᠤ ᠵᠣᠷᠢᠯᠭ᠎ᠠ ᠪᠠᠷ ᠦᠰᠦᠭ ᠢᠶᠠᠨ ᠲᠣᠮᠣ ᠬᠡᠪᠯᠡᠭᠰᠡᠨ ᠠᠴᠠ ᠰᠢᠯᠲᠠᠭᠠᠯᠠᠭᠰᠠᠨ ᠪᠠᠶᠢᠨ᠎ᠠ᠃      ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂  ᠲᠤᠰ  ᠲᠤᠭᠤᠵᠢ ᠳᠤ  ᠡᠪᠦᠭᠡᠨ ᠤ  ᠵᠢᠭᠠᠰᠤ ᠲᠠᠢ  ᠲᠡᠮᠡᠴᠡᠯᠳᠦᠵᠦ  ᠪᠠᠶᠢᠭ᠎ᠠ  ᠦᠶ᠎ᠡ ᠶᠢᠨ ᠬᠥᠳᠡᠯᠭᠡᠭᠡᠨ ᠢ ᠲᠤᠩ ᠨᠠᠷᠢᠨ ᠳᠦᠷᠰᠦᠯᠡᠨ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃ ᠮᠣᠩᠭᠤᠯ  ᠬᠡᠯᠡᠨ ᠳᠤ  ᠣᠨᠣᠪᠴᠢᠲᠠᠢ  ᠣᠷᠴᠢᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠢ ᠥᠪᠡᠷ ᠢᠶᠠᠨ ᠴᠤ ᠳᠡᠭᠡᠰᠦ ᠣᠯᠵᠤ ᠪᠠᠶᠢᠭᠠᠳ ᠵᠡᠭᠦᠨ ᠪᠠᠷᠠᠭᠤᠨ  ᠬᠤᠶᠠᠷ  ᠮᠥᠷᠦᠨ  ᠳᠡᠭᠡᠷ᠎ᠡ ᠪᠠᠨ  ᠡᠭᠡᠯᠵᠢ ᠪᠠᠷ ᠲᠠᠯᠪᠢᠵᠤ ᠦᠵᠡᠵᠦ ᠪᠠᠶᠢᠭᠠᠳ ᠣᠷᠴᠢᠭᠤᠯᠤᠭᠰᠠᠨ᠃ ᠵᠠᠷᠢᠮ ᠬᠡᠰᠡᠭ ᠤᠨ ᠠᠭᠤᠯᠭ᠎ᠠ ᠶᠢᠨ ᠵᠢᠷᠤᠭ ᠢ ᠴᠤ  ᠵᠢᠷᠤᠵᠤ  ᠦᠵᠡᠯ᠎ᠡ᠃ ᠣᠯᠠᠨ ᠬᠡᠯᠡ ᠳᠡᠭᠡᠷᠡᠬᠢ ᠬᠡᠪᠯᠡᠯ ᠤᠳ ᠢ  ᠯᠠᠪᠯᠠᠭᠰᠠᠨ  ᠪᠣᠯᠬᠤᠷ  ᠪᠢ  ᠣᠶᠢᠷᠠᠯᠴᠠᠭ᠎ᠠ ᠪᠠᠷ  ᠨᠢᠭᠡ  ᠵᠢᠯ ᠤᠨ  ᠬᠤᠭᠤᠴᠠᠭ᠎ᠠ ᠲᠠᠢ ᠪᠡᠯᠡᠳᠭᠡᠭᠰᠡᠨ ᠪᠠᠶᠢᠵᠠᠢ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠰᠠᠷ᠎ᠠ ᠶᠢᠨ ᠬᠤᠭᠤᠴᠠᠭ᠎ᠠ ᠲᠠᠢ  ᠣᠷᠴᠢᠭᠤᠯᠤᠭᠰᠠᠨ  ᠪᠠᠶᠢᠨ᠎ᠠ᠃  ᠡᠳᠦᠷ  ᠪᠦᠷᠢ ᠭᠠᠭᠴᠠ  ᠯᠠ  ᠬᠠᠭᠤᠳᠠᠰᠤ  ᠣᠷᠴᠢᠭᠤᠯᠳᠠᠭ᠃  ᠣᠷᠴᠢᠭᠤᠯᠵᠤ  ᠳᠠᠭᠤᠰᠤᠭᠰᠠᠨ ᠤ  ᠳᠠᠷᠠᠭ᠎ᠠ  ᠭᠡᠷᠭᠡᠢ ᠳᠤ ᠪᠠᠨ   ᠤᠩᠰᠢᠵᠤ ᠥᠭᠭᠦᠭᠡᠳ ᠣᠶᠢᠯᠠᠭᠠᠮᠵᠢᠲᠠᠢ ᠭᠡᠪᠡᠯ ᠦᠷᠭᠦᠯᠵᠢᠯᠡᠨ ᠣᠷᠴᠢᠭᠤᠯᠳᠠᠭ ᠪᠠᠶᠢᠪᠠ᠃      —ᠮᠣᠩᠭᠤᠯᠴᠤᠳ ᠳᠠᠯᠠᠢ ᠠᠴᠠ ᠬᠤᠯᠠ ᠠᠮᠢᠳᠤᠷᠠᠳᠠᠭ ᠤᠴᠢᠷ ᠮᠣᠩᠭᠤᠯ ᠬᠡᠯᠡᠨ ᠤ ᠡᠨᠡ ᠲᠠᠯᠠᠷᠬᠢ ᠦᠭᠡᠰ ᠤᠨ ᠰᠠᠩ ᠳᠤᠲᠠᠮᠠᠭ ᠪᠠᠶᠢᠨ᠎ᠠ ᠭᠡᠵᠦ ᠶᠡᠬᠡᠩᠬᠢ  ᠬᠦᠮᠦᠰ  ᠡᠷᠡᠭᠡᠯᠵᠡᠳᠡᠭ  ᠪᠠᠶᠢᠬᠤ  ᠪᠠᠶᠢᠬ᠎ᠠ᠃  ᠲᠠ  ᠬᠠᠷᠢᠨ  ᠡᠭᠦᠨ ᠢ  ᠪᠡᠷᠬᠡᠰᠢᠶᠡᠯ ᠳᠤ ᠲᠣᠭᠠᠴᠠᠭ᠎ᠠ ᠦᠭᠡᠢ ᠶᠢᠨ ᠤᠴᠢᠷ ᠶᠠᠭᠤ ᠪᠣᠯ︖      —ᠮᠣᠩᠭᠤᠯ ᠬᠡᠯᠡᠨ ᠤ ᠦᠭᠡᠰ ᠤᠨ ᠰᠠᠩ ᠤᠨ ᠨᠥᠭᠡᠴᠡ ᠦᠨᠡᠨ ᠳᠤ ᠪᠠᠨ ᠲᠤᠩ ᠪᠠᠶᠠᠯᠢᠭ  ᠪᠠᠶᠢᠳᠠᠭ᠃  ᠮᠣᠩᠭᠤᠯ ᠬᠡᠯᠡᠨ ᠤ ᠦᠭᠡᠰ ᠤᠨ ᠰᠠᠩ ᠤᠨ ᠪᠠᠶᠠᠨ ᠨᠥᠭᠡᠴᠡ ᠲᠠᠢ ᠭᠡᠳᠡᠭ ᠢ ᠪᠢ ᠥᠪᠡᠷ ᠢᠶᠠᠨ ᠴᠤ ᠣᠷᠴᠢᠭᠤᠯᠭ᠎ᠠ ᠪᠠᠷ ᠳᠠᠮᠵᠢᠨ ᠪᠢᠰᠢᠷᠡᠨ ᠭᠠᠶᠢᠬᠠᠭᠰᠠᠨ ᠢ ᠲᠠᠨ ᠳᠤ ᠨᠢᠭᠤᠯ ᠦᠭᠡᠢ ᠬᠡᠯᠡᠶ᠎ᠡ᠃ ᠵᠢᠭᠠᠰᠤ᠂ ᠵᠢᠭᠠᠰᠤ ᠠᠩᠨᠠᠬᠤ᠂ ᠳᠠᠯᠠᠢ ᠲᠡᠩᠭᠢᠰ᠂ ᠤᠰᠤᠨ ᠣᠩᠭᠤᠴᠠ ᠲᠠᠢ ᠬᠤᠯᠪᠣᠭᠳᠠᠭᠰᠠᠨ ᠣᠨᠣᠭᠠᠭᠰᠠᠨ ᠨᠡᠷ᠎ᠡ ᠮᠣᠩᠭᠤᠯ ᠬᠡᠯᠡᠨ ᠳᠤ  ᠪᠦᠷ  ᠪᠠᠶᠢᠳᠠᠭ  ᠪᠥᠭᠡᠳ  ᠠᠮᠢᠳᠤ  ᠶᠠᠷᠢᠶᠠᠨ ᠤ  ᠬᠡᠯᠡ  ᠪᠣᠯᠤᠨ ︽ᠮᠣᠩᠭᠤᠯ ᠤᠨ ᠨᠢᠭᠤᠴᠠ ᠲᠣᠪᠴᠢᠶ᠎ᠠ︾ ᠵᠡᠷᠭᠡ ᠡᠷᠲᠡᠨ ᠤ ᠰᠤᠷᠪᠤᠯᠵᠢ  ᠪᠢᠴᠢᠭ ᠤᠳ ᠠᠴᠠ  ᠪᠦᠭᠦᠳᠡ ᠶᠢ  ᠬᠠᠶᠢᠵᠤ  ᠣᠯᠵᠤ ᠪᠣᠯᠳᠠᠭ᠃ ᠬᠠᠷᠢᠨ ᠪᠢᠳᠡ ᠥᠪᠡᠷ ᠢᠶᠠᠨ ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠢᠶᠠᠨ ᠪᠢᠳᠡᠨ ᠳᠤ  ᠦᠯᠡᠳᠡᠭᠡᠵᠦ  ᠥᠭᠭᠦᠭᠰᠡᠨ  ᠡᠨᠡᠬᠦ  ᠪᠠᠶᠠᠨ ᠰᠠᠩ ᠢ ᠠᠰᠢᠭᠯᠠᠬᠤ ᠦᠭᠡᠢ ᠪᠠᠶᠢᠭᠰᠠᠭᠠᠷ ᠪᠠᠶᠢᠵᠦ ᠵᠠᠯᠠᠭᠤ ᠨᠢᠭᠡ ᠦᠶ᠎ᠡ ᠶᠢᠨ ᠬᠢᠨ ᠨᠡᠩ ᠮᠡᠳᠡᠬᠦ ᠦᠭᠡᠢ᠂ ᠣᠶᠢᠯᠠᠭᠠᠬᠤ  ᠦᠭᠡᠢ ᠬᠡᠮᠵᠢᠶᠡᠨ ᠳᠤ ᠬᠦᠷᠦᠭᠰᠡᠨ᠃      ᠵᠢᠱᠢᠶᠡᠯᠡᠭᠡᠳ ᠬᠡᠯᠡᠪᠡᠯ᠂ ︽ᠵᠠᠭᠠᠷᠴᠠᠭ︾ ᠭᠡᠵᠦ ᠵᠢᠭᠠᠰᠤᠨ ᠰᠦᠷᠦᠭ ᠢ ᠨᠡᠷᠡᠯᠡᠭᠰᠡᠨ ᠪᠠᠶᠢᠳᠠᠭ᠃ ︽ᠬᠠᠪᠰᠢᠨ᠎ᠠ︾ ᠭᠡᠵᠦ ᠶᠡᠭᠡ ᠵᠢᠭᠠᠰᠤ ᠪᠠᠭ᠎ᠠ ᠵᠢᠭᠠᠰᠤ ᠪᠠᠨ ᠵᠠᠯᠭᠢᠬᠤ ᠶᠢ ᠬᠡᠯᠡᠵᠦ ᠪᠠᠶᠢᠨ᠎ᠠ᠃ ︽ᠳᠤᠯᠠᠨ ᠵᠢᠭᠠᠰᠤ︾ ᠭᠡᠵᠦ ᠠᠪᠤᠷᠭᠤ ᠵᠢᠭᠠᠰᠤ ᠶᠢ ᠨᠡᠷᠡᠯᠡᠵᠦ ᠪᠠᠶᠢᠭ᠎ᠠ ᠪᠥᠭᠡᠳ ︽ᠤᠯᠪᠠ ᠵᠢᠭᠠᠰᠤ︾ ᠶᠢᠨ ︽ᠤᠯᠪᠠ︾ ᠨᠢ  ᠮᠢᠬᠠᠨ  ᠵᠢᠭᠦᠷ ᠲᠠᠢ  ᠠᠮᠢᠲᠠᠨ ᠢ  ᠨᠡᠷᠡᠯᠡᠳᠡᠭ  ᠲᠤᠰᠬᠠᠢ  ᠨᠡᠷ᠎ᠡ ᠦᠭᠡ ᠨᠦᠭᠦᠳ ᠪᠠᠶᠢᠳᠠᠭ ᠪᠠᠶᠢᠨ᠎ᠠ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂  ᠠᠯᠢ  ᠪᠣᠯᠬᠤᠷ  ᠤᠭ  ᠰᠠᠨᠠᠭ᠎ᠠ ᠶᠢ  ᠬᠤᠪᠢᠷᠠᠭᠤᠯᠬᠤ  ᠦᠭᠡᠢ ᠪᠠᠶᠢᠳᠠᠯ ᠳᠤ ᠮᠣᠩᠭᠤᠯ ᠬᠡᠯᠡᠨ ᠤ  ᠬᠡᠷᠡᠭᠯᠡᠭᠡᠨ ᠳᠤ  ᠵᠣᠬᠢᠴᠠᠭᠤᠯᠤᠨ  ᠵᠠᠷᠢᠮ  ᠦᠭᠡ ᠶᠢ  ᠣᠷᠴᠢᠭᠤᠯᠤᠭᠰᠠᠨ᠃  ᠵᠢᠱᠢᠶᠡᠯᠡᠪᠡᠯ᠂ ︽ᠵᠢᠭᠠᠰᠤ ᠤᠶᠠᠭ᠎ᠠ ᠲᠣᠭᠤᠷᠢᠨ ᠡᠷᠭᠢᠬᠦ᠁︾᠂ ︽ᠡᠪᠦᠭᠡᠨ ᠪᠢ ᠰᠡᠭᠦᠳᠡᠷ ᠠᠴᠠ ᠪᠠᠨ ᠥᠭᠡᠷ᠎ᠡ ᠬᠠᠨᠢ ᠦᠭᠡᠢ ᠭᠡᠬᠦ ᠳᠤ ᠵᠢᠭᠠᠰᠤ ᠴᠤ ᠰᠡᠭᠦᠯ ᠠᠴᠠ ᠪᠠᠨ ᠥᠭᠡᠷ᠎ᠡ ᠨᠥᠬᠦᠷ ᠦᠭᠡᠢ︾᠂ ︽ᠲᠡᠩᠭᠢᠰ ᠤᠨ ᠮᠠᠨᠳᠤᠯ ᠠᠭᠤᠯᠠ ᠰᠢᠭ᠋ ᠣᠪᠤᠶᠢᠨ  ᠡᠷᠭᠦᠭᠳᠡᠵᠦ᠁︾᠂ ︽ᠤᠰᠤ ᠬᠠᠭᠠᠷᠠᠨ ᠢᠷᠠᠭᠳᠠᠬᠤ ᠨᠦᠰᠡᠷ ᠪᠢᠲᠡᠭᠦᠦ ᠳᠠᠭᠤᠨ ᠪᠣᠯᠤᠨ᠁ ᠤᠰᠤ ᠴᠠᠯᠭᠢᠬᠤ  ᠬᠦᠨᠳᠦ  ᠱᠤᠤᠭᠢᠶᠠᠨ᠁︾  ᠭᠡᠬᠦ ᠵᠡᠷᠭᠡ ᠪᠠᠶᠢᠨ᠎ᠠ᠃ ᠮᠡᠳᠡᠭᠡᠵᠢ ᠬᠠᠮᠤᠭ ᠤᠨ ᠡᠴᠦᠰ ᠲᠤ ᠬᠢᠷᠢ ᠵᠡᠷᠭᠡ ᠣᠷᠴᠢᠭᠤᠯᠤᠭᠰᠠᠨ ᠢ ᠤᠩᠰᠢᠭᠴᠢᠳ ᠮᠠᠨᠢ ᠯᠠ ᠦᠨᠡᠯᠡᠨ᠎ᠡ᠃      ᠮᠣᠩᠭᠤᠯ ᠬᠡᠯᠡᠨ ᠤ ᠮᠠᠨᠢ ᠪᠠᠶᠠᠨ ᠨᠥᠭᠡᠴᠡ ᠶᠢ  ᠲᠠᠨᠢᠵᠤ  ᠣᠯᠤᠭᠰᠠᠨ  ᠶᠠᠪᠤᠳᠠᠯ ᠨᠢ  ᠡᠨᠡᠬᠦ  ᠲᠤᠭᠤᠵᠢ ᠶᠢ  ᠠᠩᠭ᠍ᠯᠢ ᠬᠡᠯᠡᠨ ᠠᠴᠠ ᠨᠢ ᠰᠢᠭᠤᠳ ᠮᠣᠩᠭᠤᠯ ᠬᠡᠯᠡᠨ ᠳᠤ ᠣᠷᠴᠢᠭᠤᠯᠤᠭᠰᠠᠨ ᠤ ᠵᠢᠩᠬᠢᠨᠢ ᠦᠨ᠎ᠡ ᠥᠷᠲᠡᠭ ᠪᠣᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠮᠥᠨ ᠮᠢᠨᠦ ᠬᠠᠮᠤᠭ ᠤᠨ ᠲᠣᠮᠣ ᠣᠯᠵᠠ ᠪᠣᠯᠵᠠᠢ᠃ ᠮᠣᠩᠭᠤᠯ ᠬᠡᠯᠡ ᠮᠠᠨᠢ ᠠᠯᠢ ᠴᠤ  ᠦᠨᠳᠦᠰᠦᠲᠡᠨ ᠤ  ᠵᠣᠬᠢᠶᠠᠯ  ᠪᠦᠲᠦᠭᠡᠯ ᠤᠳ ᠢ ᠣᠷᠴᠢᠭᠤᠯᠬᠤ ᠳᠤ ᠪᠦᠷᠢᠨ ᠬᠠᠩᠭᠠᠯᠲᠠᠢ ᠪᠠᠶᠠᠯᠢᠭ ᠪᠠᠶᠢᠳᠠᠭ᠃      —ᠲᠠ ᠵᠠᠯᠠᠭᠤᠴᠤᠳ ᠲᠤ ᠵᠣᠷᠢᠭᠤᠯᠵᠤ ᠶᠠᠭᠤ ᠬᠡᠯᠡᠮᠡᠷ ᠪᠠᠶᠢᠨ᠎ᠠ︖      —ᠭᠠᠳᠠᠭᠠᠳᠤ ᠤᠷᠠᠨ ᠵᠣᠬᠢᠶᠠᠯ ᠤᠳ ᠢ ᠡᠬᠡ ᠬᠡᠯᠡ ᠪᠠᠷ ᠨᠢ ᠤᠩᠰᠢᠭᠰᠠᠨ ᠮᠣᠩᠭᠤᠯ ᠳᠡᠭᠦᠦ ᠨᠠᠷ ᠡᠳᠦᠷ ᠤᠨ ᠣᠳᠣ ᠰᠢᠭ᠋ ᠴᠥᠭᠡᠨ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨ᠎ᠠ᠃ ᠡᠨᠡ ᠨᠢ ᠮᠣᠩᠭᠤᠯᠴᠤᠳ ᠳᠡᠯᠡᠬᠡᠢ ᠶᠢᠨ ᠰᠢᠯᠢᠳᠡᠭ  ᠤᠷᠠᠨ  ᠵᠣᠬᠢᠶᠠᠯ ᠲᠠᠢ  ᠰᠢᠭᠤᠳ ᠲᠠᠨᠢᠯᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠭ᠎ᠠ ᠶᠢᠨ ᠴᠢᠬᠤᠯᠠ  ᠨᠢᠭᠡᠨ  ᠰᠢᠯᠲᠠᠭᠠᠨ  ᠭᠡᠵᠦ  ᠪᠢ  ᠦᠵᠡᠵᠦ  ᠪᠠᠶᠢᠨ᠎ᠠ᠃  ᠴᠢᠨᠠᠭᠰᠢᠳᠠ ᠥᠨᠥᠳᠥᠷ ᠤᠨ ᠮᠣᠩᠭᠤᠯ ᠤᠷᠠᠨ  ᠵᠣᠬᠢᠶᠠᠯ  ᠳᠡᠯᠡᠬᠡᠢ ᠶᠢᠨ  ᠲᠥᠪᠰᠢᠨ ᠳᠤ  ᠬᠦᠷᠦᠭᠰᠡᠨ  ᠵᠣᠬᠢᠶᠠᠯ  ᠴᠤ  ᠭᠠᠷᠴᠤ  ᠠᠮᠵᠢᠭ᠎ᠠ ᠦᠭᠡᠢ ᠶᠢᠨ ᠰᠢᠯᠲᠠᠭᠠᠨ ᠡᠨᠡ ᠮᠥᠨ ᠪᠣᠯᠪᠠ ᠤᠤ ᠭᠡᠵᠦ ᠪᠢ ᠦᠷᠭᠦᠯᠵᠢ ᠰᠡᠳᠬᠢᠳᠡᠭ᠃      ᠣᠷᠴᠢᠭᠤᠯᠭ᠎ᠠ ᠪᠣᠯ ᠨᠢᠭᠡ ᠦᠨᠳᠦᠰᠦᠲᠡᠨ ᠤ ᠤᠷᠠᠨ ᠵᠣᠬᠢᠶᠠᠯ ᠪᠣᠯᠤᠨ ᠰᠤᠶᠤᠯ ᠤᠨ ᠬᠥᠭᠵᠢᠯ ᠤᠨ ᠬᠢᠷᠢ ᠲᠥᠪᠰᠢᠨ ᠢ ᠬᠠᠷᠠᠭᠤᠯᠵᠤ ᠴᠢᠳᠠᠬᠤ ᠴᠢᠬᠤᠯᠠ ᠪᠠᠷᠢᠮᠵᠢᠶ᠎ᠠ ᠪᠤᠯᠬᠤ ᠶᠤᠮ᠃ ᠨᠢᠭᠡ  ᠦᠨᠳᠦᠰᠦᠲᠡᠨ  ᠳᠡᠯᠡᠬᠡᠢ ᠶᠢᠨ  ᠰᠤᠶᠤᠯ ᠤᠨ  ᠲᠡᠷᠢᠭᠦᠨ ᠤ ᠡᠩᠨᠡᠭᠡ ᠳᠤ ᠶᠠᠪᠤᠨ᠎ᠠ ᠭᠡᠪᠡᠯ ᠵᠠᠪᠠᠯ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠤ ᠰᠢᠯᠢᠳᠡᠭ ᠰᠤᠶᠤᠯ ᠢ ᠰᠤᠷᠤᠯᠴᠠᠬᠤ ᠶᠢᠨ ᠵᠡᠷᠭᠡᠴᠡᠭᠡ ᠥᠪᠡᠷ ᠤᠨ ᠦᠨᠳᠦᠰᠦᠲᠡᠨ ᠤ ᠪᠠᠨ  ᠰᠢᠯᠢᠳᠡᠭ  ᠰᠤᠶᠤᠯ ᠢ  ᠳᠡᠯᠡᠬᠡᠢ  ᠳ᠋ᠠᠬᠢᠨ ᠳᠤ   ᠲᠠᠨᠢᠭᠤᠯᠬᠤ   ᠶᠣᠰᠣᠲᠠᠢ᠃   ᠡᠨᠡᠬᠦ   ᠶᠠᠪᠤᠴᠠ ᠳᠤ ᠣᠷᠴᠢᠭᠤᠯᠭ᠎ᠠ᠂ ᠲᠡᠷᠡ ᠳᠤᠮᠳᠠ ᠪᠠᠨ ᠮᠠᠰᠢ ᠰᠠᠶᠢᠨ ᠣᠷᠴᠢᠭᠤᠯᠭ᠎ᠠ ᠱᠠᠭᠠᠷᠳᠠᠭᠳᠠᠨ᠎ᠠ᠃      ᠣᠳᠣ ᠶᠢᠨ ᠵᠠᠯᠠᠭᠤᠴᠤᠳ ᠤᠨ ᠠᠩᠭ᠍ᠯᠢ ᠬᠡᠯᠡᠨ ᠤ ᠬᠢᠷᠢ ᠲᠥᠪᠰᠢᠨ ᠨᠠᠳᠠ ᠠᠴᠠ ᠰᠠᠶᠢᠨ ᠪᠠᠶᠢᠨ᠎ᠠ᠃  ᠡᠶᠢᠮᠦ  ᠤᠴᠢᠷ ᠵᠠᠯᠠᠭᠤ ᠦᠶ᠎ᠡ ᠶᠢᠨ ᠬᠢᠨ ᠭᠠᠳᠠᠭᠠᠳᠤ  ᠤᠷᠠᠨ  ᠵᠣᠬᠢᠶᠠᠯ ᠤᠳ ᠢ  ᠤᠭ  ᠬᠡᠯᠡ ᠪᠠᠷ ᠨᠢ  ᠤᠩᠰᠢᠬᠤ ᠶᠢ  ᠴᠢᠬᠤᠯᠠᠴᠢᠯᠠᠬᠤ ᠶᠢᠨ ᠵᠡᠷᠭᠡᠴᠡᠭᠡ ᠨᠡᠩ ᠴᠢᠬᠤᠯᠠ ᠨᠢ ᠥᠪᠡᠷ ᠤᠨ  ᠦᠨᠳᠦᠰᠦᠲᠡᠨ ᠤ  ᠰᠢᠯᠢᠳᠡᠭ  ᠪᠦᠲᠦᠭᠡᠯ ᠤᠳ ᠢᠶᠠᠨ  ᠳᠡᠯᠡᠬᠡᠢ ᠶᠢᠨ  ᠬᠦᠮᠦᠰ ᠲᠤ ᠲᠠᠨᠢᠯᠴᠠᠭᠤᠯᠬᠤ ᠶᠠᠪᠤᠳᠠᠯ ᠶᠤᠮ᠃ ᠡᠭᠦᠨ ᠳᠤ ᠭᠠᠭᠴᠠ ᠭᠠᠳᠠᠭᠠᠳᠤ ᠬᠡᠯᠡ ᠶᠢ ᠯᠠ ᠰᠠᠶᠢᠨ ᠰᠤᠷᠤᠭᠰᠠᠨ ᠪᠠᠶᠢᠵᠦ ᠪᠤᠯᠬᠤ ᠦᠬᠡᠢ᠂ ᠬᠠᠷᠢᠨ ᠡᠬᠡ  ᠬᠡᠯᠡ ᠪᠠᠨ  ᠮᠠᠷᠲᠠᠬᠤ  ᠦᠭᠡᠢ ᠶᠢᠨ  ᠦᠨᠳᠦᠰᠦᠨ  ᠳᠡᠭᠡᠷ᠎ᠡ  ᠪᠤᠰᠤᠳ  ᠬᠡᠯᠡ  ᠪᠤᠶᠤ  ᠪᠤᠰᠤᠳ  ᠲᠠᠯ᠎ᠠ ᠶᠢᠨ ᠮᠡᠳᠡᠯᠭᠡ ᠨᠦᠭᠦᠳ ᠢ  ᠰᠠᠶᠢᠨ  ᠡᠵᠡᠮᠰᠢᠬᠦ  ᠶᠣᠰᠣᠲᠠᠢ᠃  ᠪᠢᠳᠡᠨ ᠤ  ᠵᠠᠯᠠᠭᠤᠴᠤᠳ  ᠠᠵᠢᠯᠯᠠᠵᠤ᠂  ᠠᠮᠢᠳᠤᠷᠠᠬᠤ᠂   ᠦᠢᠯᠡᠰ ᠪᠦᠲᠦᠭᠡᠬᠦ ᠳᠤ ᠪᠠᠨ ︽ᠡᠪᠦᠭᠡᠨ ᠪᠠ ᠳᠠᠯᠠᠢ︾  ᠲᠤᠭᠤᠵᠢ ᠲᠠᠬᠢ  ᠡᠪᠦᠭᠡᠨ  ᠠᠳᠠᠯᠢ  ᠡᠷ᠎ᠡ  ᠵᠣᠷᠢᠭ ᠢᠶᠠᠷ  ᠠᠵᠢᠯᠯᠠᠪᠠᠯ  ᠯᠠᠪᠲᠠᠢ ᠠᠮᠵᠢᠯᠲᠠ ᠳᠤ ᠬᠦᠷᠴᠦ ᠴᠢᠳᠠᠨ᠎ᠠ ᠭᠡᠳᠡᠭ ᠲᠤ ᠢᠲᠡᠭᠡᠯ ᠲᠠᠢ ᠪᠠᠶᠢᠨ᠎ᠠ᠃          —ᠪᠢᠳᠡᠨ ᠤ ᠤᠷᠢᠯᠭ᠎ᠠ ᠶᠢ ᠬᠦᠯᠢᠶᠡᠨ ᠠᠪᠴᠤ ᠰᠤᠷᠪᠤᠯᠵᠢᠯᠠᠭ᠎ᠠ  ᠥᠭᠭᠦᠭᠰᠡᠨ  ᠲᠠᠨ ᠳᠤ  ᠪᠠᠶᠠᠷᠯᠠᠯ᠎ᠠ᠃  ᠲᠠᠨ ᠳᠤ ᠠᠵᠢᠯ ᠤᠨ ᠥᠨᠳᠥᠷ ᠠᠮᠵᠢᠯᠲᠠ ᠶᠢ ᠬᠦᠰᠡᠶ᠎ᠡ᠃          —ᠪᠠᠶᠠᠷᠯᠠᠯ᠎ᠠ᠃          ᠬᠤᠯᠪᠣᠭᠠᠰᠤ᠄                ᠡᠸ᠋ᠷᠨᠢᠰᠲ · ᠡᠾᠮᠢᠩᠸᠧᠢ ︵Ernest Miller Hemingway᠂ 1899 . 6  .22-1961. 7. 2︶ ᠠᠮᠧᠷᠢᠺᠠ ᠶᠢᠨ ᠵᠣᠬᠢᠶᠠᠯᠴᠢ᠂ ᠰᠡᠳᠬᠦᠯᠴᠢ᠃ 1954 ᠣᠨ ᠳᠤ ︽ᠡᠪᠦᠭᠡᠨ ᠲᠡᠩᠭᠢᠰ ᠬᠤᠶᠠᠷ︾ ᠲᠤᠭᠤᠵᠢ ᠪᠠᠷ ᠢᠶᠠᠨ ᠨᠣᠪᠧᠯ ᠤᠨ ᠱᠠᠩᠨᠠᠯ  ᠬᠦᠷᠳᠡᠭᠰᠡᠨ ᠪᠥᠭᠡᠳ ᠠᠮᠧᠷᠢᠺᠠ ᠶᠢᠨ ᠤᠳᠬ᠎ᠠ ᠵᠣᠬᠢᠶᠠᠯ ᠢ ᠳᠡᠯᠡᠬᠡᠢ ᠨᠡᠶᠢᠲᠡ ᠳᠤ ᠲᠦᠭᠡᠭᠡᠨ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠳᠠᠶᠢᠨ ᠤ ᠴᠠᠭ ᠤᠨ ᠠᠮᠢᠳᠤᠷᠠᠯ ᠢ ᠬᠦᠦᠷᠨᠢᠨ ᠪᠢᠴᠢᠬᠦ ᠲᠠᠯ᠎ᠠ ᠪᠠᠷ ᠢᠶᠠᠨ ᠨᠡᠷ᠎ᠡ ᠳᠤ ᠭᠠᠷᠤᠭᠰᠠᠨ  ᠵᠣᠬᠢᠶᠠᠯᠴᠢ ᠪᠠᠶᠢᠪᠠ᠃ 1926 ᠣᠨ ᠳᠤ ︽ᠢᠨᠳᠢᠶᠠᠨ ᠣᠲᠤᠭ︾ ᠨᠡᠷ᠎ᠡ ᠲᠠᠢ ᠪᠣᠭᠤᠨᠢ ᠥᠭᠦᠯᠡᠯᠭᠡ ᠪᠠᠨ ᠪᠢᠴᠢᠨ ᠠᠯᠳᠠᠷᠰᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠠᠴᠠ ᠬᠤᠶᠢᠰᠢ ︽ᠨᠠᠷᠠ ᠬᠡᠵᠢᠶᠠᠳᠠ ᠮᠠᠨᠳᠤᠨ᠎ᠠ︾ ︵The Sun Also Rises︶ ︵1926︶᠂ ︽ᠪᠠᠶᠠᠷᠲᠠᠢ᠂ ᠵᠡᠷ ᠵᠡᠪᠰᠡᠭ ᠮᠢᠨᠢ︾ ︵A Farewell to Ar︶ ︵1929︶᠂ ︽ᠺᠢᠯᠢᠮᠭᠵᠢᠷᠤ᠋ ᠠᠭᠤᠯᠠ ᠶᠢᠨ ᠴᠠᠰᠤ︾  ︵1933︶ ᠵᠡᠷᠭᠡ ᠠᠯᠳᠠᠷᠲᠠᠢ ᠪᠦᠲᠦᠭᠡᠯ ᠤᠳ ᠢᠶᠠᠨ ᠲᠤᠭᠤᠷᠪᠢᠭᠰᠠᠨ ᠪᠢᠯᠡ᠃ ᠳᠤᠯᠠᠭᠠᠨ ︵ᠴᠧᠨ ᠭᠠᠩ ᠯᠦᠩ︶᠄  ᠪᠡᠭᠡᠵᠢᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠫᠷᠣᠹᠧᠰᠰᠣᠷ᠂ ᠳ᠋ᠣᠺᠲ᠋ᠣᠷ ᠤᠨ ᠵᠢᠯᠤᠭᠤᠳᠤᠭᠴᠢ ᠪᠠᠭᠰᠢ᠃ ᠥᠪᠥᠷ ᠮᠣᠩᠭᠤᠯ ᠤᠨ ᠥᠪᠡᠷᠲᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠵᠠᠷᠤᠳ ᠬᠤᠰᠢᠭᠤ ᠨᠤᠲᠤᠭ ᠲᠠᠢ᠃  1997 ᠣᠨ ᠳᠤ ᠪᠡᠭᠡᠵᠢᠩ ᠤᠨ ᠪᠠᠭᠰᠢ ᠶᠢᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠳ᠋ᠣᠺᠲ᠋ᠣᠷ ᠴᠣᠯᠠ ᠬᠠᠮᠠᠭᠠᠯᠠᠨ ᠪᠡᠭᠡᠵᠢᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢ ᠶᠢᠨ ᠠᠵᠢᠯ ᠤᠨ ᠭᠠᠷᠤᠭ᠎ᠠ ᠪᠠᠨ ᠡᠬᠢᠯᠡᠭᠦᠯᠵᠡᠢ᠃ ︽ᠮᠣᠩᠭᠤᠯ ᠠᠮᠠᠨ ᠵᠣᠬᠢᠶᠠᠯ ᠤᠨ ᠬᠠᠷᠢᠴᠠᠭᠤᠯᠤᠭᠰᠠᠨ ᠰᠤᠳᠤᠯᠤᠯ︾᠂  ︽ᠮᠠᠩᠭᠤᠰ ᠤᠨ ᠦᠯᠢᠭᠡᠷ ᠤᠨ ᠰᠤᠳᠤᠯᠤᠯ︾᠂ ︽ᠰᠢᠯᠢ ᠶᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ︾᠂ ︽ᠰᠦ ᠲᠠᠢ ᠴᠠᠢ ᠪᠠ ᠺᠣᠹᠧ︾᠂ ︽ᠳᠣᠷᠣᠨ᠎ᠠ ᠳᠠᠬᠢᠨ ᠤ ᠠᠮᠠᠨ ᠵᠣᠬᠢᠶᠠᠯ ᠤᠨ ᠲᠦᠢᠮᠣ︾ ᠵᠡᠷᠭᠡ ᠭᠤᠴᠢ ᠭᠠᠷᠤᠢ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠨᠣᠮ ᠪᠢᠴᠢᠭ ᠬᠡᠪᠯᠡᠭᠦᠯᠵᠦ᠂  ᠳᠣᠲᠣᠭᠠᠳᠤ᠂  ᠭᠠᠳᠠᠭᠠᠳᠤ ᠳᠤ 100 ᠭᠠᠷᠤᠢ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠥᠭᠦᠯᠡᠯ ᠨᠡᠶᠢᠲᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ︽ᠮᠣᠩᠭᠤᠯ ᠬᠦᠮᠦᠨ︾᠂ ︽ᠨᠦᠢᠲᠠᠨ ᠰᠠᠷᠠ︾᠂ ︽ᠰᠢᠷ᠎ᠠ ᠨᠢᠳᠦᠨ ᠬᠡᠦᠬᠡᠨ︾ ᠵᠡᠷᠭᠡ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠲᠡᠭᠦᠪᠦᠷᠢ ᠲᠠᠢ ᠪᠥᠭᠡᠳ ︽ᠮᠣᠩᠭᠤᠯ ᠬᠦᠮᠦᠨ︾ ᠨᠢ ᠮᠣᠩᠭᠤᠯ ᠤᠯᠤᠰ ᠤᠨ ᠰᠤᠷᠬᠤ ᠪᠢᠴᠢᠭ ᠲᠤ ᠰᠤᠩᠭᠤᠭᠳᠠᠨ ᠬᠡᠪᠯᠡᠭᠦᠯᠦᠭᠳᠡᠭᠰᠡᠨ ᠪᠠᠶᠢᠨ᠎ᠠ᠃ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠲᠡᠷᠡ ᠬᠡᠦᠬᠡᠳ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠠᠩᠬᠠᠷᠤᠯ ᠬᠠᠨᠳᠤᠭᠤᠯᠤᠨ᠂ ᠮᠣᠩᠭᠤᠯ ᠤᠯᠤᠰ ᠤᠨ ᠨᠡᠷᠡᠲᠦ ᠬᠡᠦᠬᠡᠳ ᠤᠨ ᠵᠣᠬᠢᠶᠠᠯᠴᠢ ᠵ᠊ ∙ᠳᠠᠰᠢᠳᠤᠨᠳᠤᠭ ᠤᠨ ᠬᠠᠮᠲᠤ ︽ᠮᠣᠩᠭᠤᠯ ᠤᠯᠤᠰ ᠤᠨ ᠬᠡᠦᠬᠡᠳ ᠤᠨ ᠰᠢᠯᠦᠭ ᠤᠨ ᠰᠣᠩᠭᠤᠮᠠᠯ︾ ᠶᠢ ᠰᠣᠩᠭᠤᠨ  ᠨᠠᠶᠢᠷᠠᠭᠤᠯᠵᠤ  ᠬᠡᠪᠯᠡᠭᠦᠯᠦᠭᠰᠡᠨ  ᠪᠥᠭᠡᠳ ᠥᠪᠡᠷ ᠤᠨ  ᠲᠤᠭᠤᠷᠪᠢᠭᠰᠠᠨ ᠰᠢᠯᠦᠭ ᠤᠳ ᠢᠶᠠᠨ ᠲᠡᠭᠦᠪᠦᠷᠢᠯᠡᠵᠦ  ︽ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠶᠢᠨ ᠳᠠᠭ᠎ᠠ︾  ᠨᠡᠷ᠎ᠡ ᠪᠠᠷ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠶᠢᠨ᠎ᠠ᠃    
  
ᠢᠷᠡᠯᠲᠡ᠄ ᠠᠷᠠᠳ ᠤᠨ ᠰᠥᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠰᠦᠶᠦᠭᠡ ᠫᠷᠤᠹᠧᠰᠰᠤᠷ ᠤᠨ ︽ᠴᠢᠨ᠋ᠸ᠎ᠠ ᠪᠠᠷᠢᠳᠠᠭ ᠨᠤᠬᠠᠢ︾ ᠬᠡᠬᠦ ᠲᠡᠭᠦᠪᠦᠷᠢ ᠬᠡᠪᠯᠡᠭᠳᠡᠯ᠎ᠡ
ᠠᠯᠳᠠᠨ ᠨᠠᠮᠥᠷ
ᠨᠢᠭᠤᠴᠠᠭᠠᠢ
ᠡᠵᠢ
ᠵᠡᠬᠦᠳᠤ ᠳᠡᠷᠭᠡᠯᠰᠢᠭᠰᠡᠨ ᠬᠦᠳᠡᠭᠡ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号